إعداد الحلقه
إسكربت:روني
هندسة صويتة:م/محمد شورجيه
... العشم ..الكلمة دي كبيرة اووي
...يعني انك تحط عشمك في إنسان وفي لحظة كل حاجة تطلع عكس اللي انت بتتوقعه
ساعتها بتحس ان الدنيا كلها اتقفلت في وشك واسودت ومش شايف فيها حاجة حلوة وتحس كده قلبك بيوجعك فعلا
... إنت عارف لما بتتصدم في عشمك ف حد بيكون شبه ايه؟
... بيكون شبه إحساس الطفل اللي وقع وفضل يعيط جامد وراح يجري علشان يترمي في حضن امه علشان تطبطب عليه وتراضيه بكلمه ف يلاقي كف منها علي خده علشان بيعيط وعاوزاه يبطل عياط
... هو انصدم علشان كان بيجري يستخبي ويحس بحنية ملاقش غير كف علي وشه ...انخذل
... العشم بتاعك بيكسرك لما تكون زعلان من حد عزيز عليك والزعل كبير ولما تجري عليه علشان تعاتبه وتبقي عاوز تحس انك مهم عنده زي ما هو مهم عندك وان مهما حصل الزعل مش هيغير حاجة بينكم وبتبقي عاوز تسمع منه كلام يريحك حتي لو هو غلطان يقولك انك مهم عنده وانه غلطان ومش هيعمل حاجة تزعلك تاني وانه اسف وتلاقيه مش زعلان علي زعلك وبيحسسك اان الموضوع هايف وانت اللي مكبر الموضوع ويقلب عليك الترابيزه ويزعل منك علشان انت عاتبته مع انك انت اللي زعلان !
... ساعتها بتحس ان فيه حاجة غلط وإن قلبك موجوع
_إحساسك بعشمك لما تكون قلقان علي حد عزيز عليك ،وتكون زعلان وتستني منه انه يتصل عليك ويطمنك عليه وهو ولا هنا وكل تفكيره غبي وإنك مدلوق عليه ! وعمره ما عرف يعني ايه خوفك عليه ؟ ولا هيفهم ده !
...عشمك لما تفضل تقول لحد بتحبه انا واثق فيك ودايما كنت بتقوله الكلمة دي علشان يفضل حاطط الكلمة دي دايما قدامه وميفكرش في يوم يعمل حاجة تزعلك او تصدمك وتلاقيه بيعمل الحاجة اللي بتزعلك
....ساعتها قلبك هيوجعك من العشم الزايد ده ف متحطش عشمك الكبير ف حد ميقدروش
............. وبس خلاص ............